پرەزيدەنت جولداۋىنداعى بەسىنشى باعىتتا ءبىزدىڭ الدىمىزعا ناقتى مىندەت قويىلدى. وندا ايتىلعان, «قۇرىلىسقا جانە كوممۋنالدىق سەكتورعا زاماناۋي تەحنولوگيالاردى ەنگىزۋ» – قازىرگى الەمدىك دامۋ ۇدەرىسىندەگى كەزەك كۇتتىرمەيتىن ماسەلە.
بۇگىنگى تاڭدا استانا مەن الماتى قالاسىندا جانە وبلىس ورتالىقتارىندا قۇرىلىس قارقىندى ءجۇرىپ جاتقانى ءمالىم. اتاپ ايتار بولساق, ەل ازاماتتارىن باسپانامەن قامتۋعا باعىتتالعان تۇرعىن ءۇي قۇرىلىسى جەدەل جۇزەگە اسىرىلۋدا, تۇرعىن ءۇي جيناقتاۋ جۇيەسى دە ءتيىمدى جۇمىس ىستەپ جاتىر.
ارينە بۇل سالانىڭ ۇتىمدى جولعا قويىلۋىن ەلباسى تاپسىرماسىمەن جۇرگىزىلىپ جاتقان «نۇرلى جەر» تۇرعىن ءۇي قۇرىلىسى باعدارلاماسىنان ءبولىپ قاراۋعا بولمايدى.
جالپى, باسپانامەن قامتۋ كورسەتكىشى سوڭعى 10 جىلدا ءبىر تۇرعىنعا شاققاندا 30 پايىزعا ءوسىپ, بۇگىندە 21,6 شارشى مەتردى قۇراعان. بىراق, مۇنىمەن جۇمىس توقتامايدى. ەلباسى اتالعان كورسەتكىشتى 2030 جىلى 30 شارشى مەترگە دەيىن جەتكىزۋ كەرەكتىگىن ايتتى. بۇل مىندەتكە جەتۋ ءۇشىن پرەزيدەنت قۇرىلىس سالۋدىڭ جاڭا ادىستەرىن ەنگىزۋدى, زاماناۋي ماتەريالداردى, عيماراتتاردىڭ جوباسى مەن قالا قۇرىلىسىنىڭ جوسپارىن جاساعاندا تىڭ تاسىلدەردى قولدانۋ قاجەتتىگىن تاپسىردى. سەبەبى جاڭا تاسىلدەردى, وزىق تەحنولوگيانى قولدانۋ عيماراتتاردى سالۋدا ونىڭ ساپاسىنا كەپىلدىك بەرەدى. ەلباسى وسىعان باسا نازار اۋدارۋدى ەسكەرتتى. دامىعان ەلدەردەگى مەگاپوليستەردىڭ ءبىر ەرەكشەلىگى – ينتەللەكتۋالدى باسقارۋ جۇيەسى. ياعني «اقىلدى قالا». بۇل ءاربىر عيماراتتان باستالادى. جاڭا ساپادا سالىنعان تۇرعىن ۇيلەر حالىققا جايلى بولۋى شارت. تۇرعىن ءۇي سالاسىنداعى وزەكتى ماسەلەنىڭ ءبىرى – ينفراقۇرىلىم جۇيەسى. بۇل اسىرەسە, اۋدان مەن اۋىلدى جەرلەردە ءجىتى قاداعالاۋدى قاجەت ەتەدى. ەلباسى جولداۋىندا بۇل ماسەلە دە ەسكەرىلىپ, وڭىرلەردەگى اكىمدەرگە تۇرعىن ءۇي-كوممۋنالدىق ينفراقۇرىلىمىن جەتىلدىرۋ قاجەتتىگى ايتىلدى. سوعان وراي, اتالعان ماسەلەنى مەملەكەت جانە جەكەمەنشىك ارىپتەستىگى نەگىزىندە بەلسەندى شەشۋدى تاپسىردى.
وڭىرلەردەگى ينفراقۇرىلىمدى دامىتۋداعى ماڭىزدى قادامنىڭ ءبىرى اۋىلدىق ەلدى مەكەندەردى ساپالى اۋىز سۋمەن قامتاماسىز ەتۋ ەكەنى بەلگىلى. ۇكىمەت بۇل سالادا ءىرى جوبالاردى جۇزەگە اسىرىپ كەلەدى. الايدا تولىق قامتىلدى دەپ ايتۋ قيىن. بۇگىندە سۋ تاپشىلىعىن سەزىنىپ وتىرعان ەلدى مەكەندەر بار. ال كەيبىر ۇلكەن قالالار مەن مونوقالالاردىڭ ينفراقۇرىلىمدارى جاڭارۋ كەزەگىن كۇتىپ تۇر. ەلباسى اتالعان ماسەلەنى تۇبەگەيلى رەتتەۋدىڭ جولىن دا نۇسقادى. ياعني ۇكىمەت بۇل ىسكە بارلىق قاراجات كوزدەرىنەن جىل سايىن كەم دەگەندە 100 ميلليارد تەڭگە قاراستىرۋى قاجەت دەپ اتاپ كورسەتتى. قورىتا ايتقاندا, وسى اتالعان ماسەلەلەردىڭ قاي-قايسىسى دا ەلىمىزدىڭ يگىلىگىن ارتتىرۋدىڭ ناقتى تەتىگى ەكەنى انىق. سوندىقتان دا ونىڭ جۇزەگە اسۋىنا جۇمىلا اتسالىسۋ بارشامىزعا پارىز.
ايزادا قۇرمانوۆا,
پارلامەنت ءماجىلىسىنىڭ دەپۋتاتى
